Zindgi se Guftagu

Kisi shaam aa mil baithe zindgi,
Kuch sawal hai tujhse karne ko.

Tu chahe kya mujhse ye bta,
Chalna hai kaha rasta to dikha?
Kab mujhko tu hansaegi,
Kab gham lekar k jaegi?
Kyu log lage hai khush baki,
kyu baki sabko tu pyar kare?
kyu mujhko hi satati hai yu,
kyu chup chup mujhpe war kare?
Tu achhi ban k dekh zara
Tayyar hu tujhpe marne ko…

Kisi shaam aa mil baithe zindgi,
Kuch sawal hai tujhse karne ko.

Mai gusse me munh fere tha
Yu hans k jawab aya uska..

Mai chahu bas tu sath nibha,
Jis or bhi chahe rasta tu bana
Khushiyaan kamzor banati hai,
Tu ghamo ko bhi seene se laga
Mai sabke liye barabar hu,
Aankhon se zara chashma to hata.
Mujhe haq hai tujhe girane ka,
Taki tu upar uth jaye.
Tu nafrat kar ya accha samajh,
Mai khud hu tujhpe marne ko…

Kisi shaam aa mil baithe zindgi,
Kuch sawal hai tujhse karne ko.

Mud k dekha fir uski taraf,
kuch jawab tu de ab aur zara..

Jab girana hai patton ko to,
pedon pe kyu tu lati hai?
Aur hansna hai jab baad me to,
pehle kyu itna rulati hai?
Kyu khel bani baithi hai tu,
Kyu pagal sabko banati hai?
Jab rakhna hai bas kuch ko paas,
To itno se kyu milati hai?
Jo chaha maine deti hai kbhi,
Kabhi dur tu usse le jati hai.
Rango ko dekh k tere aksar
lagta hu tujhse darne ko..

Kisi shaam aa mil baithe zindgi,
Kuch sawal hai tujhse karne ko.

Ab wo thodi sa sochti hai,
Aankhon me meri dekhti hai…

Tu isko samajh le niyam hai ye,
Har pehlu se guzarna hai.
Tu jaan sake hansi ki keemat,
Isiliye to tujhko rona hai,
Mai khel hu taki tu jeete,
Pagal hu taki tu jee le.
Tu jitno se bhi milta hai,
Wo kuch na kuch sikhate hai.
Jo paya wo sab behtar tha,
Aur kho kar hi behtar pate hai.
Ye rang sabhi hisse hai tere,
Tu hai inme hi rangne ko.

Kisi shaam aa mil baithe zindgi,
Kuch sawal hai tujhse karne ko.

Mai uske jawabon ko samjha ab,
Aur hans k usko dekha ab..

To kehna tu ye chahti hai,
Har ghadi ehem hai mere liye?
Tujhko galat jo samjha tha,
Wo sab ik wehem hai mere liye?
Tu sabke liye barabar hai ,
Tu sabko mauke deti hai?
Barish k pehle dhoop tu de,
Taki barish ki qadr karein?
Bas soch pe hi apni hai sab,
Bahon me bhare ya tujhse darein?
kahin jhut to nhi boli mujhse
Sawalo ko jawab se bharne ko?

Kisi shaam aa mil baithe zindgi,
Kuch sawal hai tujhse karne ko.

Wo abki zor se hansti hai..
Aur khubsoorat lagti hai.

Ha yahi samajh le tu ab se,
Har pal me tujhko seekhna hai.
Tu galat samajh ya sahi samajh,
Tujhko to mujh sang chalna hai.
Tu kaise mujhko samajhta hai,
Bas sab usse hi hona hai.
Beshaq Gham ik sachhai hai,
Jise khatm khushi par hona hai.
Bas soch hamesha kuch achha,
Baahon me mai khud bhar lungi.
Tu jhut samajh ya sahi samajh.
Mai tujhpe bharosa kar lungi…

Kisi sham aa mil baithe zindgi,
Ab sawal nhi hai krne ko…
Bas sath me tere jeena hai,
Tera shukriya ada karne ko…

2 Comments

  1. विजय कुमार सिंह 14/06/2016
  2. डी. के. निवातिया निवातियाँ डी. के. 14/06/2016

Leave a Reply