कुए की छाया कुए मैं रैगी

कुए की छाया कुए मैं रैगी,
बात बणे ही, बस बणती बणती रैगी।
रोकणे की कोशिस ही नदी की धार नै रेत स्युं,
पण रेत ही, पाणी कै सागै ई बैयगी।१।

कुए की छाया कुए मैं ई रैगी,
बायी तो आसमाना ही, पण पताल कानी बैगी,
ईच्छा तो ही मोकली, करालां काम सांतरों,
पण मनचीती तो भाईड़ा मन-की-मन मैं ई रैगी।२।

कुए की छाया कुए मैं ई रैगी,
माटी पाल आली बस बालै मैं बैगी,
पाल बांधणे की कोशिस करी जका पिढ़यां ताणी,
बणाई ही माटी की पाल जकी, पाल बा ढैगी।३।

कुए की छाया कुए मैं ई रैगी,
कालती गाय खूँटे बंधी ही, बंधेड़ी ई रैगी,
धोलिया की जगां भूरिया आके ले भाग्या,
भूर बंटे ही आजादी की, बंटती ई रैगी।४।

मनोज चारण
मो. 9414582964

Leave a Reply