क्या हो रहा है ?

दुर्दशा इण देश री देखूँ, धक-धक धड़के हीवड़ों जी,
बारे भेजूँ बेटी ने तो, कांपे म्हारो जीवड़ों जी,
कांपे म्हारो जीवड़ों, जाणे हियो हबोला खावे है,
जीव टांगने रैवे टंगेडों, बेटी जड़ ताई आवे है।।

जाणे कुणसी ठोड़ कुलखना, मिलज्या म्हारी बचि नै,
हिडकायेड़ा गंडक बणके, बोटी खाज्या कची नै,
बोटी खाज्या कची बै, बाने बिल्कुल सरम नी आवे है,
सरमबायरा फिरे डबकता और भचिड़ा खावे है।।

फिरे भटकता कुकरमी ऐ बोतल में तेजाब लियाँ,
कद ताई बचसी डिकरडया और बचासी लाज कियाँ,
और बचासी लाज कियाँ, दुस्टया रो किण बिध नास हुवे,
धरती उथलो खाज्या जिस्या भारत में अपराध हुवे।।

एक जमानू होतो बो भी, राम अहिल्या तारी ही,
भरी सभा मैं द्रोपती लुटती, कृष्ण बढ़ा दी साड़ी ही,
कृष्ण बढ़ा दी साड़ी ही, अब लूट रिया हैवान अठे,
घर रा ही जद लूटण तुलज्या, आय बचावे कुण बठे।।

बहन भाई रो रिस्तों मोटो, होतो धरम रो मोटो धनी,
आज भाईड़ा इज्जत खोसे, हुवे बैन रो कुण धनी,
हुवे बैन रो कुण धनी, अर कुण किणरो विश्वास करे,
हुया कलंकित रिस्ता सगला, अब कुण किणरी आस करे।।

दिल्ली मैं तो दुस्टया देखो, मार लई कई दामनिया,
घर स्युं बारे निकलता डरपे, आज बठे री कामनिया,
आज बठे री कामनिया, आँसू भरती सवाल करे,
कुण बचावे लाज हमारी, कृष्ण बिना अब कियाँ सरे।।

बेटी बहन भाणजी जलमे, घर रो मोटो भाग हुवे,
बेटी बंस बधावणवाली, कुल रो आगे नांव हुवे,
कुल रो आगे नांव हुवे, अर दोय कुला री प्रीत बणे,
माता करज चुकावे भू रो, जिण दिन बा कन्या ने जणे।।

इण समाज ने अबे जरूरत, कोई नयो गोपाल बणे,
रेवे सुरक्षित पांचाली, अब शिला अहिल्या नहीं बणे,
अब शिला अहिल्या नहीं बणे, तो बणनू पड़सी राम अठे,
फिरे भटकता इन्द्र बणेड़ा, मारो बाने मिले जठे।।

मनोज चारण

मो. 9414582964

Leave a Reply